Þetta verður sennilega mín síðasta færsla... í bili a.m.k. Lífið gengur sinn vanagang og  ég geri ekki ráð fyrir því að margir gráti þessa síðu.

Hins vegar notast ég við annan vettvang í tilkynningarskyldunni ef ég fer út í haust. Berlin er þar ofarlega á listanum yfir líklegustu viðkomustaði, en Rússland, Ítalía, Belgía, Frakkland, Noregur, Danmörk og Pólland eru hins vegar freistandi sömuleiðis! Þetta þýðir að ég er kominn með smá valkvíða... en ég hlýt að finna mér góðan kennara einhversstaðar.

Þá vil ég nota þetta tækifæri til að bjóða öllum í Salinn, Kópavogi þann 21.apríl kl fimm. Þar held ég tónleikana sem áætlaðir voru í desember sl.

Góðar stundir

Hugi 

Ég fer og hitti hinn vonandiágæta Johannes Mannov á eftir, og stuttu síðar kennarann hennar Regínu.

Annars þurfti ég að bíða í klukkutíma eftir töskuni minni á kastrup og átti, því miður, heilan poka af Dumle karmellum. Til að gera langa sögu stutta vaknaði ég með slæmt tilfelli af andlitsbjúg í morgun og verk í maganum. Ég á ekki heilan poka af Dumle karamellum lengur.

 En hei, hvað gat ég svosem gert í klukkutíma annað en að borða?

Ég verð að segja eins og er að þetta ,,minn sirkus" er bara þvæla.  Kynnt með fyrirheit um rómantík og hvað eina.  Fífl! Ég á unnustu og kæri mig ekki um svona daður. Ég er hér með hættur að blogga á þessari síðu.

Færi inn nýtt lén von bráðar

Nú er þessu andleysi síðustu mánaða lokið og nokkur orð fá sennilega að flakka á síðuna mína á ný.

Ég fékk óbeit á því að blogga, og nennti því ekki eins og glöggir lesendur hafa tekið eftir.

Nú hefur Nótt í Feneyjum breyst í dag á ný, og ég hef allt í einu ekkert að gera. Reyni að drullast til að læra nýja texta og vinna heimavinnuna mína að öðru leiti, sem og húsverk. Svo er bara gaman að skipuleggja og byrja að æfa fyrir næstu tónleika.

Ég er ekki búinn að leita, og þar með ekki búinn að finna mér vinnu í sumar. Uppástungur eru vel þegnar.

... Guðný er svo elskuleg að draga mig inn í þetta klukk fyrirbæri. Allt í lagi með það.

Hér kemur það!

Fjögur störf sem ég hef unnið við um ævina.... sextán ára að skúra, bónleysa og fl. skemmtilegt á næturnar í Bónus, Ikea og fleiri spennandi stöðum. Ótrúlegt en satt entist ég í þessu í nokkur ár með skóla. - Hellulagnir og almenn jarðvinna í þrjú sumur.  -   Kristiansand insjeniörvesenet, regn- og klóaklagnaviðhaldsvinna, auk ýmissa tilfallandi verkefna eins og snjómokstur, kaffidrykkja og almenn leti.  -   Þjónn á Jómfrúnni, síðar í Súlnasal og að lokum í Hlégarði í nokkur ár.

Fjórar bíómyndir sem ég horfi á í gríð og erg.... Pulp Fiction trónir í efsta sætinu, með um 50-60 skipti.  -   The Nightmare before Christmas er í öðru  -  The Goonies var í tækinu í nokkra mánuði fyrir um 15 árum, og er alltaf næstum komin í það aftur.  -  Shawshank Redemption, síðust á listanum, en alls ekki síst. Annars á ég eftir að uppgötva ansi margar bíómyndir, rétt eins og bækur sem ég hef aldrei tíma til að lesa.

Fjórir staðir sem ég hef búið á... Lindarbraut 2 á Seltjarnarnesi er upphafsreiturinn.  -  Markholt 6 tók við og aldi mig fram að 19 ára aldri.  -  Vardåsveijen 57, nýtt hús en þó að hruni komið,(Kristiansand) þar sem ég vann við að vera latur í eitt ár.  -  Sólvallagata 34, 101. Mig langar aftur í Vesturbæinn!!!

Fjórir góðir sjónvarpsþættir...  Married, with children, eru viðbjóðslega fyndnir þættir. -  Little Britain eru óborganlegir.  -  Spaugstofan, hafa nánast alið mig upp, hvort sem ykkur finnst þeir fyndnir eður ei.  -  Ég sakna Futurama.

Fernt á vefnum annað en blogg...  enskiboltinn.is  -  pósturinn minn... uuu...? Ég er svo lítill netverji að ég neyðist til að segja pass.

Fernir staðir heimsóttir í fríi...  Arnarstapi ætti að vera mitt annað heimili, en er það ekki.  -  Berlin, skemmtileg og svolítið skrítin borg.  -   Oslo... í allra bænum, farið eitthvert annað í frí!  -  Lignano... Lúðrasveitaferðir sem voru ógleymanlegar.

Matur (þið fattið núna að ég ætla að nefna fernt).... Plokkfiskurinn hennar mömmu með rúgbrauði og fullt af smjöri er, og mun ávallt verða það besta sem ég fæ.  -  Ég drekk alveg ógeðslega mikið af kaffi, sé það gott.... æi, bara allt of mikið kaffi yfir höfuð.   -   Gott rauðvín er minn akkilesarhæll.  -   LAKKRÍS og SÚKKULAÐI

Hvað fjóra staði annarstaðar en akkúrat hér varðar, langar mig eiginlega bara að vera þar sem ég er.... nema kanski að vera uppi á sviðinu á Metropolitan að syngja aðalhlutverk í Verdi óperu.

Fernar konur í mínu lífi...  Mamma er alltaf best.  -  Natalia Portman.   -   aæsldkfj   -  Berglind Ýr, verðandi konan mín (fædd 1.april 1980), er fallegust og hreint út sagt æðisleg. 

Ég ætla að klukka alla sem lesa þetta og hafa ekki enn verið klukkaðir... sem sagt engan!

Ég heiti Hugi, og er svolítill sauður.

Ég var nefnilega svo óskaplega sniðugur að eyða laugardeginum í afslöppun og örlitla öldrykkju. Komrate Tobbi og ég fengum okkur yndislegan Víetnamskan mat og sötruðum öl yfir fótbolta. Þaðan lá leiðin á frumsýningu lítillar Mozart óperu úr Hans Eisler skólanum. Tobbi var Dé Joð og tryllti lýðinn eftir tveimur ágætis hljómsveitum sem héldu uppi fjörinu þar til við byrjuðum að þeita geislaplötum. Á meðan þessu stóð fór ég að sækja meiri ,,Pour-boire" í hraðbanka rétt hjá... í um tveggja km fjarlægð. Tók svo leigubíl aftur sem tók um hálftíma, því hann talaði varla þýsku, og enga ensku, og fór með mig að röngu tónlistarhúsi. Eftir afar skemmtilegt rifrildi við leigubílstjórann greiddi ég hálft gjald, 6e, og hélt áfram skemmtuninni til kl.sex, hálf sjö þegar við loksins fórum heim, ekkert hræðilega ölvaðir... en nokkuð þó. Vandamálið var hinsvegar að ég þurfti að vakna um átta til að ná fluginu til London. Þar brást mér bogalistin, og ég hentist út í leigubíl, kílómeter neðar í götunni og bað hann að flýta sér út á flugvöll. Ja, naturlich!, og áfram fórum við á um tuttugu til fjörtíukílómetra hraða út á völl. Ég lenti þarna á öllum rauðum ljósum sem til eru, og ,,Driving-miss-Daisy" bílstjórinn minn, vildi fá að vita allt um Ísland og var ofsalega indæll... ég þunnur og veikur (sem ég er reyndar enþá) of seinn í flug og übertoll! Ég kom á völlinn rúmum þrjátíu mínútum fyrir brottför, leitaði að Ryan Air check in í tvær, þrjár mínútur og þegar ég komst loksins, stóðu tvær ógeðslega ljótar og asnalegar kellingar brosandi og sögðu ,,zorry, ví ar zklósd". ég sem var bara með handfarangur, n.b. ,grátbað með mínum mýkstu augum um miskun, en þá kom... ,,No vei... regúleizion". Þá beit ég fast í handabakið á mér og gekk hljóðlega niður á neðri hæðina til að vera ekki handtekinn sem hver annar flugdólgur. Flugmiði á síðustu stundu er ekki mjög ódýr, en ég komst til Londrais um einum og hálfum tíma síðar...

London er yndisleg borg. Þar keypti ég mér Tottenham treyju og húfu. Borðaði subbulegan mat og horfði á fótbolta með aðra höndina á pænti og poka af krisps eins og venjan er í krúnuveldinu forna. Bragi, nýja kaffivélin hans og Haffi fá kærar þakkir fyrir gott atlæti í þessari góðu borg.

Vorsingen gekk bara mjög vel... alveg þangað til að ég missti röddina í seinni ariunni, búinn að vera með hita og er enn með hálsbólgu, en gömlu konurnar í nefndinni hölluðu sér allavega fram á borðið og brostu út að eyrum í þeirri fyrri. Þetta var í það minnsta frábær reynsla og gaman að skoða sig um í Deutche Oper.

Nóg um það. Við fórum að sjá Händel, Alcina, í Komiche Oper í gærkvöldi. Fyrri hálfleikurinn var hreint hræðilegur og mig minnir að það séu uþb 65 kastarar framan á balkónunum. Þarna voru þó nokkrir klassasöngvarar og yfir heildina bara mjög gaman. Tókum strikið á Oskar Wilde og röðuðum í okkur samlokum og bjór við undirleik hræðilega lélegs japansks trúbadors. Enduðum kvöldið á billiard og meiri bjór og sofnuðum yndislega fullir við að skipuleggja tónlist fyrir partí kvöldsins.